Bwoy mi haffi share something wid unno, fi tell di truth unno really have some bright and ups woman out deh fi real you know.


Yeah, unno done know sey mi nuh ramp fi put fi mi business out deh already. Cause if mi can chat up mi friend dem own, unno done sey mi nuh tink nuttin fi talk fi mi own.


Well mi still kinda pissed off over dis argument whey mi have wid one girl whey call mi man phone di odda night.


Mi inna di bathroom and hear mi man phone a vibrate nuh hell di odda mawning…and between mi and unno anytime fi him phone deh pon vibrate mi get suspicious…cause a ting did guh dung one time…but dat’s anodda story.


When me look pan the phone mi si one familiar number and ask di gal if she back pon di list again why she a call up mi man phone fah…but mi shock fi find out sey a nuh did one mi did tink sey a one new one from Atlanta…mi nah call har name, she know herself.


Unno done know sey mi no care so mi tell har fi go find a man of har own and lef out fi mi. Yuh know sey she tell me plain sey she not leaving him and all bright enough fi a ask if mi tie him! All a ask a whey mi have suh…fi real, mi pop off a big laugh cause if mi have to go to those lengths then might as well di man gwaan…and mi not even know if dem tings deh work anyway.


Di girl cool as yuh please tell mi it nuh meck nuh sense mi frustrate myself, mi fi just gwaan cook callaloo and green banana gi di man meck she f—k it back outa him.


Well a dey suh mi get bringle and give har a piece a mi mind. Mi tell har sey mi man hardlef mi side and him gi mi round di clock attention and in fact di ongle time him nuh deh sida mi a when wi have one argument and even if him gi har a likkle pitty sort off, she mustn’t get carried away wid it.


In fact mi tell har she nuh inna mi league, suh she must go get a good education and mind di pickney whey she a beg help fah.


Mi nuh haffi tell yuh sey she blow up inna mi ears, but hear wha, she lucky, she caan come inna fi mi league.


Fi real dough, a whey unno duh wid gal whey bright suh?