Bwoy mi a tell yuh, di recession a lick everybody but mi a tell yuh sey it dread pon dis ex a mine. Dats why mi a tell yuh sey when tings a gwaan fi yuh, yuh mussi hype and galang like sey you know what can meck patty.
Yeah, him use to spend a change pon mi but more time him come like sey him woulda waan mi fi crawl pon mi knee fi get nutten outa him han.
Yeah man fi ten years mi panka panka wid him and di wuss ting bout it nuff time time mi all a depressed cause between mi an unno him have him wife and yes mi know unno a guh sey mi deserve it, but when mi did just get in, him neva tell mi sey him married. A matter a fact mi neva si him wid ring pon finga yet! Suh when mi eventually find out mi did done in too deep.
But mi nah lie yuh still, more time when mi can deal wid di frustration mi hop pon a plane and go a Bahamas go check a little guy whey crazy bout mi…and him a one real wucker man!
So fi real, more and more mi get fi shake di feeling whey mi did have fi di married man.
Afta mi finally get ova him and move on wid mi life di man come a borrow, borrow money from mi and di wuss ting is him come een like sey him waan use sex fi repay it.
But si yah, a whey him teck tings fah, him tink sey him can use wucking fi pay mi back mi money.
Man him need fi wheel and come again.
Anyway…mi haffi ketch back a flight to Bahamas…so mi wi check in more time seen.