« Hottie hottie of the week | Main | Today's Daily Word - Thursday, March 12, 2009 »
March 11, 2009
Merciless and Cobra
Whoi...mi couldn't stop laugh di odda day when mi a read Merciless challenge whey him a sen out to Cobra fi teck him on, bout a him nex. When mi read whey Cobra sey Merciless mussn't call him name cause him know whey him a talk bout mi couldn't help it sah. But di ting whey sweet mi is dat Cobra sey Merciless fi listen Helta Skelta and him wi know sey him nuh inna fi him league fi go teck on clash wid him! Cobra sey Merciless beat Ninja inna him weak stage, him beat Ninja when him strong! Merciless, wi affi agree enjoy yuh victory and nuh badda gu spoil yuh record by taking on Corbra...yuh nuh know sey some snake too deadly fi yuh mess wid.
Vampire Dog
But a wha dat we a read inna di paper bout vampire dog whey a eat off di people dem goat. What nutten coulda really guh suh sah. But afta all di almshouse whey a gwaan a Jamaica, it nuh surprising dat even di dog dem a get possess too.
Transport Authority fi cool
No sah, dem transport people a teck a joke too far now. Imagine yuh a go tell people bout it illegal fi drive round inna public transport wid radio!!! If storm a come, if road block, if any newsbreak you caan get it first hand...wuss yuh gooda alla drive inna sinting whey di radio a warn you not to. No man it come een like dem transport people waan some real work fi do.
.