« Hottie Hottie of the Week from Weddy Weddy | Main | Stench leads neighbours to headless child's body »
October 02, 2008
What a bangarang
By: Buffilous
Yow mi peeps, mi a tell yuh sometimes mi haffi wonda why some people really badda wid relationship. Mi convince a more trouble dan it wut more time. Teck dis woman whey mi know. She life abroad and she married to dis man fi some fifteen years during which she a di main bread winner. She did have two pickney before she married, a son who a now 24 and a daughter whey a 20. She gwaan juggle and tings until finally did husband get back pon him feet and start to meck some real money. Him build a couple a houses in Jamaica including one whey him sey a di matrimonial home.
Being as di two a dem a mi bredrin mi come a Jamaica and decide fi pay di man a visit and bring dung something whey him wife sen fi him cause through him out ya a oversee di project dem. Backfoot, yuh nuh know whey mi buck up inna , mi nuh ketch him live a house wid one 23-year-old girl whey did win one pageant out yah. Big old grey tone man a gwaan like sey him young a shack up wid young gal whey ongle a nyam him out. Cause mi nuh know wha else him tink di woman si inna him.
And di wuss ting inna all a dis is dat when himd eh a foreign him wife haffi drive him round cause him woulda dead if him go inna one car and drive. Now him deh a Jamaica drive round di girl like him employed fi do it. But di drama nuh done yet. Di same woman whey him a profile wid a di same one him wife did sponsor and help financially.
Di wife get wind a it fly dung and low and behold she get a hold a him phone and di amount a indecent picture whey she find pon it she nearly have heart attack. Di wuss ting bout it she did swear sey di man a handicap when it come to phone. One piece a bangarang, fight and yeye black and blue…and di woman fly back out.
Now dem de pon divorce street, but mi nuh know how dat a guh guh, cause everyting inna di wife name…talk bout bangarang